Hulya Okalîn/ JINHA

COLEMÊRG - Hevseroka KCD'ê Selma Irmak di derbarê 8'ê Adarê Roja Jinên Kedkar a Cihanê de axivî û got ku 8'ê Adarê di sala 2016'an de dê bi pêşengiya jina kurd de bibe sala şoreşa azadiya gelê kurd.

Di dîroka cîhanê de tundiya li ser bedena jinê di asta herî jor de ye. Lê heya niha tu dewlet ji bo rawestandina tundiya li ser jinê zagonek amadenekirine û tundiya li ser bedena jinê ji rêzê dibîne. Jin li hemberî vê hişmendiyê têdikoşin û berxwedanek bêhempa didin meşandin. 8'ê Adarê Roja Jinên Kedkar a Cihanê mînakek ji têkoşina jinan a li dijî hişmendiya desthilatdariyê ye.

'Ala berxwedana 8'ê Adarê jinên kurd wergirt'

Li seranserî cîhanê jin di her salvegera 8'ê Adarê dadikevin kolanan û bi çalakiyên cur bi cur vê rojê pêşwazî dikin. Hevseroka KCD'ê Selma Irmak jî wate giringiya 8'ê Adarê nirxand û diyar kir ku jinan ji bo azadiya xwe gelek bedelên mezin dane û îro jinên kurd ala berxwedana 8'ê Adarê wergirtin û bi rihê berxwedana 8'ê Adarê li hemberî zilmê têdikoşin û li ber xwe didin. Selma got ku berxwedan û têkoşina jinên kurd Sêvê Demîr, Fatma Umar û Pakîze Nayir ên ku li Sîlopiyê ji aliyê hêzên dewletê ve hatin qetîlkirin , dê moxra xwe li 8'ê Adara 2016'an bide û bi rihê berxwedan wan 8'ê Adarê bê pîroz kirin.

'Ji bo jina kurd 8'ê Adarê xwedî giringiyek mezin e.

Selma got ku îsal 8'ê Adarê ji bo jina kurd xwedî wete û giringiyek mezin e û wiha pê de çû: "Wek ku tê zanîn îsal têkoşîna jina kurd di hemû rojeva cihanê de cihê xwe girtiye û dê ev têkoşîn û berdxwedana mezin di dîroka cihanê de jî cihê xwe bigire. Bi salan e ku jinên kurd ji bo azadiya xwe li hemberî hemû zilm û tundiya hişmendiya bavîksalariyê li berxwe didin. Ji ber vê yekê jî ji bo jina kurd 8'ê Adarê xwedî giringiyek gelek mezin e. Birastî ji bo jina kurd her roj berxwedan û têkoşîna 8'ê Adarê ye. Ji ber ku jina kurd her tim di nav têkoşinê de ne."

'Jinên daxwaza mafê xwe dikin bi zindî tên şewîtandin'

Selma di berdewamiya axaftina xwe de têkoşîna jinên New Yorkê yên ku di fabrîkeyê de bi zindî hatin şewîtandin û jinên Bakûrê Kurdistanê ku ji aliyê dewleta Tirk ve tên şewîtandin şibihand hev û ev tişt got: "Li New Yorkê 120 jin ji ber daxwaza maf û hevpariya kar kirin di fabrikayê de û bi zindî hatin şewîtandin û têkoşina jinê wiha çewsandin. Niha li heremên Kurdistanê yên ku rêveberiya xweser lê
hate îlan kirin û di pêşengiya jinê de têkoşîn û berxwedanek tê meşandin, jin dibin hedefa dewletê. Bi dehan hevalên me yên jin di jêrzemînan de bi zindî hatin şewîtandin. Hişmendiya hemû desthîlatdariyan li dijî jinê wek hev e. Jinên ku ji bo daxwaza mafên xwe têdikoşin bi zindî tên şewîtandin. Çawa ku her sê xuşkên Mirabelan hatin tecawiz kirin û pişt re hatin qetîlkirin niha dewleta tirk li jinên kurd dike. Jina kurd dikuje û bedenên wan tehşîr dike."

'Hişmendiya DAIŞ û AKP'ê wek hev e'

Selma diyar kir ku 8'ê Adarê îsal dipêşengiya jina kurd de dê bibe sala şoreşa azadiya gelê kurd û axaftina xwe wiha domand: "Di vê pêvajoyê de me baş dît ku di hedefa dewletê de di serî de jin heye. Ji ber dewlet jî baş dizane ku dema jin ketin nav têkoşînê tu kes nikare berxwedan û têkoşina wan bişkîne. Lewra dewlet di şexsê jinê de têkoşîna gelan dê bişkîne. Lê jin bi biryar in û heya azadiya xwe nedin avakirin dê li hemberî zilmê têbikoşin û berxwedana xwe bidomînin. Çeteyên DAIŞ'ê jî li Rojava û Şengalê jinan revand û li bazara koleyan difirotin û bi hovane qetîl dikirin. DAIŞ ji ber bi têkoşîna jinên berxwedêr nikaribû tola xwe bivê rêbazê hildida. Niha dewleta tirk jî heman tiştê dike. Hişmendiya DAIŞ û AKP'ê wek hev e."

Selma di dawiya axaftina xwe de anî ziman ku ew soz didin hemû hevalbendên xwe yên ku li dijî zilma desthilatdariyê têkoşiyan û hatin qetîlkirin, dê ala têkoşîna wan ew ê hildin û şoreşa wan dixwest dê bidin avakirin.

(rc)