Filiz Zeyrek/JINHA

EDENE - Jinên ku li Parka Milliyê her roj dezgehê xwe vedikin ji bo debara xwe bikin tenê bîcî bîcî difroşin. Jin li vir him qezencê dikin him jî bi avayekî kolektîf pirsgirêkên xwe çareser dikin. Jinan anî ziman ku tenê pirsgirêka wan a di parkê de zabitane lewre zabita nahêlin dezgehên xwe vebikin.

Li Navçeya Yûregir ya Bajarê Edenê jin li Taxa Sinanpaşa di Parka Kuvayi Mîllîyê de dezgehên bîcî bîcî vedikin û bi vî awayî debara xwe dikin. Li Edenê kesen ku dixwazin germahiya havînê xelas bibin herî zêde bîcî bîcî dikirin. Bîcî bîcî heba wê bi 3 TL tê firotin û jinên ku vî karî dikin debara mal û zarokên xwe jî bi vî awayî pêk tînin. Jinên ku bîcî bîcî difroşin aciziya xwe ya astenkirina zabitayan anî ziman û diyar kirin ku heger cîhek ji wan re were amadekirin dikarin bac bidin şaredariyê. Jina bi navê Gûlten Gezer a 65 salî bilêv kir ku 15 sale bîcî bîcî difroşe û debara xwe dike. Gûlten wiha axivî: "Heta niha min ewqas pirsigirêk nekişandibû. Ez di vê emrê xwe de bi berxwedaniyê nan dibim mala xwe. ''

'Dezgeh û sandaliyên me dişkînin'

Gulten ji ber ku zarokên wê zewicîne bi hevserê xwe ve tenê dijîn û hevserê we jî ji ber ku nexweşê Epîlepsî(sara) ye debara mala xwe bi tenê dike. Gulten aciziya xwe ya hember zabitayan jî anî ziman û got: ''Piştî vî emrî karekî ez bikim nîne. Em li vir 4 jin dixebitin. Em amadene ku bac (vergî) jî bidin. Bila ceyran û avê bidin me, em şert û mercên wan qebul dikin. Tenê bila ji bo nanê me nebin asteng. Divê em serê sibê seat 08.00' an de dest bi kar bikin lê ji ber ku zabita astengiyê derdixîne em bende mesaîya zabitayan diminîn.. Gulten da zanîn ku sandalî û dezgehên ku bî keda rojan distînin zabita tên ew dezgeh û sandalyê wan dişikînin.

'Divê jin bi xwe jiyana xwe qezenç bikin'

Gûlten da xuya kirin ku ji ber germahiya havînê gel bîcî bîcî dikire û dema jinan dibinîn pir kefxweş jî dibin û axaftina xwe wiha berdevam kir "Ji ber ku jin karê xwe paqij dike, gel jî bi dilê rihet dixwe. Ew jî me kefxweş dike. Divê jin aboriya xwe bigre destê xwe û jiyana xwe qezenç bike. Ji destê jinan hemû kar tê ji ber vê jî divê jin li destê tû kesî mêze nekin.''

'Him li malê him li devre dixebitim'

Dursun Hizalçik a dayika 44 salî xwedî 5 zarokan e, 5 sale bicî bicî difroşe. Dayika Dursun ji ber ku derfetên wan tûnebû zarokên xwe nedaya xwendinê û hevserê wê jî naxebite hemû barê malê li ser wê ye. Dursun diyar kir ku him lî malê him jî li derve dixebite û axaftina xwe wiha domand "Ez nexweşê dil im lê disa jî ji bo zarokên xwe divê bixebitim. Ji ber ku ez di him di malê de him jî li dev re kar dikim pir diwestim. Ez nikarim kirya mala xwe bidim. Ev dezgeh jî tûne be gelo emê çi bikin?. Zabitayên şaredariyê ji bo me astengiyê derdixînin û em bi rihetî nikarin karê xwe bikin. Zabita bi awayekî tûndî nêzî me dibin. Em li vir bang li Serokê Şaredariyê Hûseyîn Sozlû dikin ka ji me çi dixwazin? ''

'Jinên li vir tekoşîna kolektîf ya jiyanê didin'

Dursun diyar kir ku ew 4 jin bi hev dû re li dezgehên cuda kar dikin û kêmasiyên heyî dîsa bi hev re çareser dikin. Dursun axaftina xwe wiha bi dawî kir: ''Em li vir bi awayek kollektîf dixebitin. Di vî welatî de bi rastî jî jinbûn pir zehmet e. Em him li malê n him li derve dixebitin. Lê em jin dive xwe hêz bikin. Zihniyeta mêran hemû kedxwariyê dike,me dike kole û dikûje. Pêkutiyên niha li ser me tê kirin ji ber hişmendiya mêran ê wek pergalek li ser gel tê ferzkirin e. Li ser mirovan polîtikayên tirsê tên avakirin. Em ji hevalên jin alîkariyê dixwazin, divê jinên mafparêz alîkariya me bikin.''

(pk/ch)